दाङ, २४ भदौ । दाङको तुलसीपुर उपमहानगरपालिका वडा नम्बर ७ गणेशपुरस्थित राप्ती शान्ति उद्यान स्थानीय तथा राष्ट्रिय पर्यटकहरूका लागि आकर्षणको केन्द्र बन्दै गएको छ।
शान्त वातावरण, हरियाली, र विविध जातका बोटबिरुवाले भरिपूर्ण यो उद्यान दाङ जिल्लाको प्रमुख पर्यटकीय गन्तव्यको रूपमा परिचित हुँदैछ । उद्यानमा गत आर्थिक वर्षमा मात्रै २ लाख बढीले अवलोकन गरेको अध्यक्ष डिल्लीराज भण्डारीले बताउनुभयो ।
उद्यानले पर्यटकहरूलाई प्रकृतिसँग नजिकिने अवसर प्रदान गर्नुका साथै, ध्यान र शान्ति अनुभव गर्न अनुकूल स्थानको रूपमा विकास भएको उहाँले बताउनुभयो ।
उहाँका अनुसार, उद्यानले पर्यटनको विकाससँगै समुदायको आर्थिक विकासमा पनि सकारात्मक भूमिका खेलेको छ ।
उद्यानलाई थप सुधार र विस्तार गर्ने योजना रहेको अध्यक्ष भण्डारीले बताउनुभयो । उहाँले यस योजनामा उद्यानमा थप संरचना निर्माण, सुन्दरताको अभिवृद्धि, र पर्यटकको सुविधाका लागि आवश्यक पूर्वाधारको विकास समावेश गरिने बताउनुभयो ।
नजिकिँदो पर्यटकीय मौसममा उद्यानमा आगन्तुकहरूको संख्या थप वृद्धि हुने अपेक्षा गरिएको छ, जसले दाङ जिल्लाको पर्यटन प्रवर्द्धनमा उल्लेखनीय योगदान पुर्याउनेछ।