दाङ, ४ बैशाख ।
तुलसीपुरको धारापानी सामुदायिक वनमा आगलागी भएको छ । तुलसीपुर उपमहानगरपालिका वडा नम्बर- ७ मा रहेको धारापानी सामुदायिक वनमा आज दिउँसो करिब १ बजेतिर आगो लागेको हो ।
आगो लागेको देखेपछि स्थानीयले जनप्रतिनिधि, प्रहरी र दमकललाई खबर गरेका हुन् । घटनास्थलमा अहिले तुलसीपुर उपमहानगरको दमकल र सुरक्षा निकाय पुगेपनि आगो नियन्त्रण गर्न सम्भव नभएको तुलसीपुर- ७ का वडा अध्यक्ष राम बहादुर जिसीले जानकारी दिनुभयो ।
आगो नियन्त्रण गर्नका लागि उपमहानगरको टोली, अस्थाइ प्रहरी पोष्ट पर्सेनी, सशस्त्र प्रहरी, स्थानीय बासीन्दा, वन समुहका उपभोक्ता, पदाधिकारी लगायतले प्रयास गरिरहेका छन् । अहिले अग्नी रेखा बनाई आगो निभाउने काम गरि रहेको उहाँको भनाइ छ ।
स्थानीय टिका पौडेलले आगो बस्तीमा पुग्न सक्ने जोखिम बढेको बताउनुभयो । हावा लागेकाले आगो भित्र-भित्र फैलिदा निभाउन कठिनाइ भएको बताउनुभयो । अहिले धुवाले गाउँ नै अन्धकार हुन थालेको उहाँको भनाइ छ ।
आगो नियन्त्रणमा ल्याउने प्रयास भईरहेको ईलाका प्रहरी कार्यालय तुलसीपुरका प्रहरी प्रमुख डिएसपी पुष्पराज मल्लले जानकारी दिनुभयो ।