२०८१ बैशाख ११ गते मङ्गलवार

एनआईसी बैंकको गढवा शाखामा तालाबन्दी



दाङ, १४ पुस ।
एनआइसी एसिया बैंक गढवा शाखामा तालाबन्दी गरिएको छ । व्यवसायीको इच्छाविपरीत जबरजस्ती रूपमा वस्तुको मूल्य निर्धारण गरी लिलाम प्रक्रिया अघि बढाएको विरोधमा तालाबन्दी गरिएको हो ।

एनआइसी बैंक राजपुर शाखाबाट गढवा निवासी रामदास यादवले तीन करोड कर्जा लिनुभएकोमा बैंकले जग्गा र व्यवसाय लिलाम प्रक्रियामा लगेपछि व्यवसायीले तालाबन्दी गरेका हुन् ।

महाशक्ति इन्टरप्राइजेचको नाममा कर्जा थियो । तर त्यो कर्जा उठाउन बैंकले व्यवसायीलाई मानसिक यातना दिएको आरोप छ । दाङ उद्योग वाणिज्य संघको अगुवाइमा जिल्लाभरका उद्योग वाणिज्य संघको सहभागितामा तालाबन्दी गरिएको दाङ उद्योग वाणिज्य संघका निवर्तमान अध्यक्ष नारायणप्रसाद भुसालले बताउनुभयो ।

‘तीन करोड ३२ लाखको मूल्यांकन देखिन्छ । तर तीन करोड १८ लाख कर्जा तिर्नुपर्ने देखिन्छ । जग्गा धितोबाट मूल्यांकन पुग्ने देखिँदादेखिँदै सपल र गोदाममा बैंकले शिल गर्‍यो’, भुसालले भन्नुभयो, ‘लिलाम गर्दा सामानको स्थानीय मुल्यांकन गरिएन, हचुवाको भरमा सामान बिक्री गर्न थालियो ।’

सुरुमा एक करोड लगानी गरेको व्यवसायीलाई पछि थप दुई करोड कर्जा लगानी गरिएको थियो । कर्जा लगानी गर्दा पनि बैंकले बदमासी गरेको आरोप छ । लिलाम भएको सामान लोड गर्ने बेलामा व्यवसायीले रोकेका छन् ।

प्रकाशित मिति : २०७९ पुष १४ गते बिहिवार