दाङ, ६ असोज ।
दाङको तुलसीपुरमा खुकुरी प्रहारबाट एक जनाको मृत्यु भएको छ । खुकुरी प्रहारबाट अन्य दुईजना घाइते भएका छन् ।
खुकुरी प्रहारबाट मृत्यु हुनेमा तुलसीपुर ११ बेलटाकुराको भगवति टोलका अन्दाजी ४३ वर्षिय रिता लामिछाने रहेको इलाका प्रहरी कार्यालय तुलसीपुरका प्रहरी निरीक्षक नवराज केसीले जानकारी दिनुभयो ।
आज दिउँसो साढे २ बजे बेलटाकुराको भगवति टोलका करिव ३९ वर्षीय टेक बहादुर हमालले आफ्नो घरबाट धारीलो खुकुरी निकाली रिता लामिछानेलाई उहाँकै घर अगाडी उभिइ रहेको अबस्थामा एक्कासी घाटिमा खुकुरी प्रहार गर्दा लामिछानेको घटना स्थलमै मृत्यु भएको हो ।
त्यसैगरी उनले सोहि ठाउँका अन्दाजी ४५ वर्षीय बिर बहादुर हमाल र ६५ वर्षीय कमला कुमारी हमाल माथि खुकुरी प्रहार गरेका हुन् । खुकुरी प्रहारबाट बिर बहादुरको दाहिने हातमा चोट लागेको छ । दुबै जनाको राप्ति प्रादेशिक अस्पताल तुलसीपुरमा उपचार भइरहेको प्रहरीले जनाएको छ ।
दुबै जनाको अबस्था मध्यम रहेको छ । खुकुरी प्रहार गर्ने टेक बहादुरलाई घर भित्र लुकिछिपि बसेको अबस्थामा खुकुरी सहित नियन्त्रणमा लिई ईलाका प्रहरी कार्यालय तुलसीपुरमा राखिएको छ । घटनाको विषयमा थप अनुसन्धान भइरहेको प्रहरीले जनाएको छ ।