२०८० फाल्गुन १३ गते आइतवार

टरिगाउँ विमानस्थलको स्तरोन्नतीका लागी पहल भैरहेको छ : मास्की



दाङ, १ कार्तिक ।
लुम्बिनी प्रदेशका अर्थमन्त्री धनबहादुर मास्कीले टरिगाउँ विमानस्थलको स्तरोन्नती निरन्तर पहल गरिरहेको बताउनुभएको छ । दाङको तुलसीपुर उपमहानगरपालिकाले बुधबार गरेको शुभकामना आदानप्रदान कार्यक्रममा अर्थमन्त्री मास्कीले विमानस्थल बनाउने अधिकार संघिय सरकार मातहत भएका कारण पनि प्रदेश सरकारले चालु वर्षमा बजेट बिनियोजन गर्न नसकेको बताउनुभयो ।

उहाँले बजेट निर्माण अघि स्थानीय सरकार र प्रदेश सरकारले बजेट बिनियोजन गरेर टरिगाउँ विमानस्थलको विस्तार गर्ने योजना बनाएपनि विमानस्थल संघिय सरकारलेमात्रै बनाउने प्रावधान भएकाले बजेट बिनियोजन गर्न नसकिएको बताउनुभयो ।

पश्चिम दाङको विकासमा अघि बढेको भन्दै उहाँले साविक राप्ती अन्चलको सदरमुकाम तुलसीपुरको विकास निर्माणका लागि आवश्यक पहल गरिरहेको बताउनुभयो ।

अर्थमन्त्री मास्कीले ग्वारखोला हाइड्यामको काम पनि छिट्टै अघि बढ्ने बताउनुभयो । हाईड्याम निर्माण गरी सिंचाई, खानेपानी र पर्यटन क्षेत्रको विकास गर्न सकिने उहाँको धारणा छ ।

यस्तै लुम्बिनी प्रदेश सरकारले लोकल मदिरा ब्रान्डिङ गरेर रोजगारी सिर्जना गर्ने योजना अघि सारेको बताउनुभयो । उहाँले नमुनाका लागि बाँकेमा मौवाको रक्सी उत्पादनको काम शुरु भइसकेको बताउनुभयो ।

तुलसीपुर उपमहानगरपालिका प्रमुख टिकाराम खड्काले उपमहानगरपालिकाको करिब ६० करोड दायित्वलाई शुन्यमा झार्न सफल भएको बताउनुभयो । उहाँले अहिले उपमहानगरपालिका दायित्वको भारबाट उम्कन सफल भएको दावि गर्नुभएको हो ।

कार्यक्रममा लुम्बिनी प्रदेश प्रहरीका वरिष्ठ उपरीक्षक कृष्णबहादुर पल्ली मगर, तुलसीपुर नगरका पुर्व मेयर ढुण्डीराज लामिछाने, नेपाली कांग्रेस तुलसीपुर नगर सचिव बिमल पौडेल लगायतले तुलसीपुरको विकासका लागि सबैको सहयोग र सहकार्य आवश्यक भएको बताउनुभयो ।

कार्यक्रममा नेकपा एमाले तुलसीपुरका सचिव रूप बहादुर खत्री, नेकपा माओवादी तुलसीपुरका ईन्चार्ज प्रभात वली, राष्ट्रिय स्वतन्त्र पाटीका प्रदेश कमिटीका सदस्य भक्त बहादुर डाँगी, तुलसीपुर चेम्बर अफ कमर्सका अध्यक्ष टोप बहादुर घर्ती, तुलसीपुर नगर जेसिजका अध्यक्ष शालिकराम वली लगायतले तुलसीपुर शहरलाई व्यवस्थित गर्न तीनै तहका सरकारको ध्यान पुग्नुपर्ने बताउनुभयो । उपप्रमुख स्यानी चौधरीको स्वागत मन्तव्यबाट शुरु भएको कार्यक्रमको सहजीकरण नगरका प्रवक्ता माधव वलीले गर्नुभएको हो ।

प्रकाशित मिति : २०८० कार्तिक १ गते बुधवार