सल्यान, २६ पुस ।
सल्यानको कपुरकोट गाउँपालिकाले स्थानीय उत्पादनको प्रवद्र्धन र बजारीकरणलाई प्रोत्साहन गर्न कोशेली घरसहित कृषि मिनी ल्याब, कृषक परामर्श सेवा केन्द्र र चिस्यान केन्द्र सञ्चालनमा ल्याउने भएको छ । सबै परियोजनाको भोलि (शनिबार) संयुक्तरुपमा उद्घाटन गरिने भएको हो ।
गाउँपालिकाका अध्यक्ष दुर्गा बहादुर पुनले कृषिजन्य वस्तुसंगै कपुरकोट गाउपालिकाको ऐतिहासिक र साँस्कृतिक पहिचान झल्काउने वास्तुकला, मुर्तिकला, खाद्यान्न ,सजावटका वस्तु उत्पादन र बजारीकरण गर्न कोशेली घरसहित कृषि मिनी ल्याब, कृषक परामर्श सेवा केन्द्र र चिस्यान केन्द्र सञ्चालनमा आउन लागेको बताउनुभयो ।
उहाँले गाउँपालिकाभित्र उत्पादन हुने विभिन्न सामग्रीलाई प्रदर्शन गरेर ती उत्पादनको बजारीकरणका लागि नयाँ अवसर सिर्जना गर्ने उद्देश्य राखिएको बताउनुभयो । स्थानीयस्तरमै उत्पादित सामग्रीलाई उपभोक्तासम्म पु¥याउने र कृषकलाई नविनतम सेवाहरूमा पहुँच दिन कोशेली घर र सेवा केन्द्रहरू संचालनमा ल्याउन लागिएको अध्यक्ष पुनले बताउनुभयो ।
शनिबार प्रतिनिधि सभा सदस्य प्रकाश ज्वाला र प्रदेश सभा सदस्य भिमप्रकाश शर्माले सबै परियोजनाको संयुक्त रूपमा उद्घाटन गर्ने गाउँपालिकाले जनाएको छ । गाउँपालिकाका उपाध्यक्ष प्रकाश भण्डारीले स्थानीय उत्पादनहरू प्रदर्शनमा ल्याउन आग्रह गर्नुभएको छ । कृषि मिनी ल्याब र कृषक परामर्श सेवा केन्द्रको स्थापना गाउँपालिकाको कृषि विकास योजनाको एक महत्वपूर्ण अंग मानिएको उहाँले बताउनुभयो ।
सेवा केन्द्रमा कृषकहरूलाई कृषिजन्य वस्तु उत्पादनमा आधुनिक प्रविधि प्रयोग गर्न प्रेरित गर्नुका साथै समस्या समाधानका लागि आवश्यक प्राविधिक परामर्श उपलब्ध गराइनेछ । यस्तै चिस्यान केन्द्र संचालनमा आएपछि कृषकहरूले उत्पादन गरेको कृषिजन्य वस्तु भण्डारण गर्न सजिलो हुने र बजारसम्म सहज पहुँच हुने अपेक्षा गरिएको उपाध्यक्ष भण्डारीले बताउनुभयो ।
स्थानीय उत्पादनहरू प्रदर्शनमा ल्याउन सहयोग पु¥याउन प्रमुख प्रशासकीय अधिकृत भरत कुमार वलीले सम्बन्धित वडा कार्यालयलाई आग्रह गर्नुभएको छ । उहाँका अनुसार सामग्री ल्याउने सहभागीहरूलाई यातायात खर्च समेत उपलब्ध गराइने छ ।
कपुरकोट गाउँपालिकालाई कृषि तथा स्थानीय उत्पादनको क्षेत्रमा अग्रणी बनाउन कोशेली घरसहित कृषि मिनी ल्याब, कृषक परामर्श सेवा केन्द्र र चिस्यान केन्द्र सञ्चालनमा ल्याउन लागेको प्रमुख प्रशासकिय अधिकृत वलीले बताउनुभयो ।
