दाङ, २२ जेठ ।
दाङको तुलसीपुरमा मोटरसाइकलको ठक्करबाट पैदल यात्रीसहित तिन जना घाइते भएका छन् । आज दिउँसो साढे ३ बजे तुलसीपुर–१२ एयरपोर्ट नजिकै तुलसीपुरबाट जसपुरतर्फ जादै गरेको रा ४ प २४२९ नम्बरको मोटरसाइकलले पैदल यात्री तुलसीपुर–१० गोलौराका १७ बर्षिय सृष्टी चौधरीलाई ठक्कर दिएको हो ।
उक्त मोटरसाइकल अनियन्त्रित हुँदा मोटरसाइकल चालक तुलसीपुर–४ बनहरीका २१ बर्षिय हिमाल न्यौपाने र मोटरसाइकलमा पछाडि सवार १९ बर्षिय शिशिर ओली घाइते भएको ईलाका प्रहरी कार्यालय तुलसीपुरका प्रहरी प्रवक्ता पर्वत केसीले जानकारी दिनु भएको छ ।
मोटरसाइकलमा पछाडि सवार ओलीको अबस्था गम्भिर रहेको छ । घाइतेहरुको राप्ती प्रादेशिक अस्पताल तुलसीपुरमा उपचार भइरहेको छ ।घटनाको बारेमा थप अनुसन्धान भइरहेको प्रहरीले जनाएको छ ।
प्रकाशित मिति : २०८० जेष्ठ २२ गते सोमवार