२०८१ जेष्ठ ९ गते बुधवार

स्वतन्त्र सांसद पुन फेरि माओवादीमै प्रवेश



रोल्पा, २० पुस ।
लुम्बिनी प्रदेशसभामा स्वतन्त्रबाट निर्वाचित प्रदेश सभा सदस्य दिपेन्द्रकुमार पुनमगर नेकपा (माओवादी केन्द्र)मा प्रवेश गरेका छन् । रोल्पा प्रदेशसभा निर्वाचन क्षेत्र नम्बर (२) बाट निर्वाचित पुनमगर बुधबार माओवादी केन्द्रमा प्रवेश गर्नुभएको हो ।

प्रधानमन्त्री निवास बालुवाटारमा प्रधानमन्त्री तथा माओवादी केन्द्रका अध्यक्ष पुष्पकमल दाहालले लुम्बिनी प्रदेश सभा सदस्य पुनमगरलाई पार्टी प्रवेश गराउनुभएको हो । पुनमगरले मंसिर ४ मा भएको प्रदेश सभा निर्वाचनमा रोल्पाबाट पार्टीको निणर्य विपरीत स्वतन्त्र उम्मेदवारी दिनुभएको थियो ।

माओवादीले रोल्पा (२) बाट तत्कालीन चुनावी गठबन्धनबाट कांग्रेसमा अमरसिंह पुनलाई उम्मेदवार बनाएको थियो । जसको विरुद्धमा माओवादीका तत्कालीन पोलिटब्युरो सदस्य तथा रोल्पा जिल्ला इन्चार्जको जिम्मेवारीबाट राजीनामा दिएर पुनले स्वतन्त्र उम्मेदवारी दिनुभएको थियो । उहाँ स्वतन्त्र उम्मेदवार बनेपछि माओवादीले पार्टीबाट निष्कासन गरेको थियो ।

पुनमगरले माओवादी अध्यक्ष दाहाललाई आत्मालोचना पत्र बुझाएर पुन ः पार्टी प्रवेश गर्नुभएको हो । ‘पार्टीको पोलिटब्युरो सदस्य र रोल्पा इन्चार्जको जिम्मेवारीबाट राजीनामा दिएर उम्मेदवार बनेकोमा पार्टीले पनि सबै जिम्मेवारीबाट निष्कासन गरेकाले म पुनः पार्टीमा फर्केर पार्टीको जिम्मेवारी पूरा गर्ने प्रतिबद्धता व्यक्त गर्न चाहन्छु ।’ पत्रमा उल्लेख छ ।

तत्कालीन कांग्रेस नेतृत्वको गठबन्धनबाट रोल्पा प्रतिनिधिसभा सदस्यमा वर्षमान पुन उम्मेदवार बनेर निर्वाचित हुनुभएको छ । प्रदेश सभातर्फ भने माओवादीका जोखबहादुर महरा र स्वतन्त्र उम्मेदवारी दिएका पुनमगर निर्वाचित भएको हो । प्रदेश सभामा पराजित गठबन्धनका उम्मेदवार पुन कांग्रेस लुम्बिनी प्रदेशका सभापति पनि हुनुहुन्छ ।

प्रकाशित मिति : २०७९ पुष २० गते बुधवार