२०८१ जेष्ठ ३१ गते बिहिवार

लुम्बिनीमा भागबन्डा नमिल्दा मन्त्रीले पाएनन् जिम्मेवारी



दाङ, २ बैशाख ।
लुम्बिनीमा सरकार गठनको एक साता बितीसक्दा पनि मन्त्रिपरिषद् विस्तार हुन सकेको छैन । माओवादी नेता जोखबहादुर महरा २३ चैतमा मुख्यमन्त्री बने पनि मन्त्रालय भागबन्डामा गठबन्धन दलबीच सहमति नजुट्दा मन्त्रिपरिषद् विस्तारमा ढिलाइ भएको हो ।

२५ चैतमा मुख्यमन्त्री महराको शपथसँगै एमाले, माओवादी र जसपाबाट एक-एकजना मन्त्री नियुक्त गरे पनि उनीहरूले अझै जिम्मेवारी पाएका छैनन् । एमालेका चेतनारायण आचार्य, माओवादीका दीपेन्द्रकुमार पुनमगर र जसपाका भण्डारीलाल अहिर मन्त्री नियुक्त अुनुभएको थियो ।

एमाले संसदीय दलका उपनेता एवं एमालेबाट नेतृत्व गरेर सरकारमा सहभागी भएका मन्त्री चेतनारायण आचार्यले एक साताभित्र समिति र मन्त्रिपरिषद्ले पूणर्ता पाउने गरी तयारी गरिएको बताउनुभयो । प्रदेश सभाका संसदीय समिति एक वर्षभन्दा बढीदेखि नेतृत्वविहीन अवस्थामा रहेका छन् । नयाँ गठबन्धनले ६ वटा समिति मध्ये दुईवटा समितिको नेतृत्व कांग्रेसलाई दिने गरी तयारी गरेको छ ।

लेखा र कृषि समिति कांग्रेसलाई दिने तयारी छ । अन्य समितिको सभापतिका बारेमा गठबन्धनको छलफलबाट टुंगो लगाइनेछ । एमालेले तीन र माओवादी केन्द्रले दुईवटा सभापति लिने गरी छलफल भएको उमालेका उपनेता तथा मन्त्री आचार्यले बताउनुभयो ।

लुम्बिनी प्रदेश सभामा प्रतिनिधित्व गर्ने प्रदेश सभा सदस्य (सांसद)हरूले १७ पुस ०७९ मा शपथ लिएका थिए । यहाँ दोस्रो प्रदेश सभाको पहिलो अधिवेशन १८ पुस ०७९ मा सुरु भएको थियो । यस्तै, ३ माघमा सभामुख तथा उपसभामुख चयन भएका थिए । लुम्बिनीमा पहिलो अधिवेशनको समयमा समिति बन्न नसकेको अवस्थामा दोस्रो अधिवेशनमा समिति गठन भए । तर, तिनले अझै नेतृत्व पाएका छैनन् ।

अर्थ, उद्योग तथा पर्यटन समिति, प्रदेश मामिला तथा कानुन समिति, सार्वजनिक लेखा समिति, भौतिक पूर्वाधार तथा विकास समिति, सामाजिक विकास समिति र कृषि वन तथा वातावरण समिति रहने प्रावधान रहेको छ । लुम्बिनी प्रदेश सभामा ८७ जना सदस्य (सांसद) रहेकोमा एकजना निलम्बनमा रहेका छन् ।

१० वटा दलले प्रदेश सभामा प्रतिनिधित्व गर्छन् । सरकारका प्रवक्ता दीपेन्द्रकुमार पुनमगरले गठबन्धनमा सामेल दलहरूमध्ये कसले कति र कुन मन्त्रालय लिने भन्ने विषय छलफलमै रहेको बताउनुभयो । उहाँले समितिका सभापतिहरूको टुंगो ४ वैशाखसम्ममा लगाउने र त्यसको एक-दुई दिनभित्रमा मन्त्रिपरिषद्ले पूणर्ता पाउने बताउनुभयो।

प्रकाशित मिति : २०८१ बैशाख २ गते आइतवार